حماقي لما قال “من خوفي بقيت مبخافش” تقريبًا كان بيحقق أمنية أغلب البشرية!

هفضل ديمًا مؤمنة ان اكتر حاجة ممكن تعطل الانسان عن الحياة هى الخوف؛ احساس ان أسوأ كوابيسك ممكن يتحول لحقيقة قادر يدخلك في نوبة هلع و يموتك في اليوم ١٠٠ مرة و انت واقف و المفروض تواجه الحياة بمنتهى الحيوية و الأمل و تخبي الحرب اللي جواك و اللي في الاصل انت القتيل فيها!

مصطفى شهيب لما قال” عايز أصرخ وأقول بس وأعيط شوية وبعدين أرجع تاني للمعركة اللي مابتنتهيش، أنا حاسس إني متورط، حد حط في إيدي سيف وقالي حارب ونسي يسألني هو أنا بعرف أحارب أصلًا ولا لأ؟
أنا خايف موصلش..
وخايف أوصل أكتشف إن مش ده أصلًا اللي كنت عايزه! ” 

كان تقريبًا بيوصف حالة عدت على ٩٩.٩٪ ، و العبثي إن مهما حاولنا نتخلص من الخوف دة بيرجعلنا في وقت مكناش نتوقعه من الأساس! كأنه بيقولنا “بنقول ناسين علشان نرتاح بس و لا نسينا و لا ارتاحنا” و ان مفيش فايدة و ان امل ماتت في الحرب!

لكن الأكيد يا عزيزي القارئ ان الخوف لا يمنع حدوث الشئ و انما هو بمثابة لعنة على صاحبه و إبتلاء صعب؛ و من هنا أحب اوجه تحية لكل شخص بيحاول و بيكمل رغم خوفه و قلقه و تعبه..

إنت بطل و تستاهل كل حاجة حلوة و ربنا ما يجعل مخاوفك حقيقية و ينجيك منها يا صديق..